Байгууллагуудад зориулсан платформ хөгжүүлж байна

Мэдээллийн технологийн үндэсний парк дөнгөж гараагаа эхэлж буй гарааны шинэ тулгар компани, иргэнийг бойжуулж эхлээд 12 жилийн нүүр үзэж байна.  Энэ хугацаанд тус паркын инкубаторын хөтөлбөрт хамрагдахаар нийт 249 иргэн, компани төслөө ирүүлсэн байна. 2003 оноос хойш Мэдээлэл технологийн үндэсний парк нийт 95 компани, иргэнийг хөтөлбөртөө хамруулж, тусад нь гаргажээ. Харин яг одоогийн байдлаар энд “start-up” буюу гарааны 10 компани байрлаж, бойжиж байна. Бид эдгээр 10 компанийг цувралаар танилцуулж байгаа билээ. Энэ удаад бид программ хангамжийн чиглэлээр үйл ажиллагаа явуулж байгаа “Alchemist Technologies” компаний технологи хариуцсан захирал Ц.Мөнхцогттой ярилцлаа.

– Танай компани ямар чиглэлээр үйл ажиллагаа явуулж байна вэ?

Манай компани 2010 оноос хойш үйл ажиллагаа явуулж байгаа бөгөөд анх гурван гишүүнтэй үүсгэн байгуулагдсан. 2011 оноос хойш программ хангамжийн чиглэлээр үйл ажиллагаа явуулж эхэлсэн ба ингэснээр байгууллагуудад зориулсан платформ хөгжүүлж эхлсэн юм.

– Танай компани яг одоо ямар төсөл дээр ажиллаж байна? Цаашдын зорилгынхоо талаар сонирхуулаач?

Манай компани өнгөрсөн оны таван сард “Инкубатор” төсөлд шалгалт өгч элссэн. Энэ хугацаагаанд тодорхой хэмжээний төсөл хэрэгжүүлж нийгэмд гаргах зорилготой байгаа бөгөөд үүний нэг нь болох  www.chef.mn гэдэг сайтыг нээсэн ажиллуулж байгаа явдал юм.  Энэ нь хоол сонирхогч хүмүүсийг нэгтгэсэн, хоолны жор оруулдаг сайт бөгөөд мөн хоол сонирхогчид өөрсдийгөө сурталчлах, гарын доорхи материалаар хэрхэн хоол хийх вэ гэх мэт олон зүйлсийг багтаасан байгаа. Үүнээс гадна tulla.mn гээд сайтыг шинээр гаргасан. Энэ нь өөрт байгаа зүйлээ өөр нэгэн зүйлтэй тулж солилцох зорилготой хүмүүст зориулсан сайт байгаа юм.

– Залуу хүмүүсийн хувьд өөрсдөө бие даагаад компани байгуулахад хүндрэлтэй зүйлүүд юу байна?

Монголд шинийг хийх гээд эрэлхийлж байгаа залуус бид нарт хамгийн эхэнд тулгамдаж байгаа асуудал бол хөрөнгө мөнгөний асуудал байна. Учир нь бид мөрөөдлийнхөө төлөө хийе бүтээе гээд  нэгдээд ажиллахад байр орон сууц, хоол унд, цалин мөнгө, амьдралд хэрэглэгдэх зардлуудыг хэнээс ч хамааралгүй шийдэх болж байгаа. Их эрсдэл үүрч бизнест хөл тавихад маш их асуудал үүсдэг.

– Мэдээллийн технологийн үндэсний паркаас та бүхэнд ямар тусламж, дэмжлэг үзүүлж байна вэ?

IT паркаас бидэнд маш их тусламж дэмжлэг үзүүлж байгаа. Нэгдүгээрт 90 хувийн хөнгөлөлттэйгөөр оффис танхимаар хангаж байна. Мөн интернэтээр үнэгүй хангаж, бүтээгдэхүүн үйлчилгээг үнэгүй сурталчилж, маркетинг хийж өгдөг. Энэ бол зах зээл дээр дөнгөж бүтээгдэхүүнээ танилцуулж байгаа бидний хувьд маш том хөрөнгө оруулалт юм.

-Танай компаний хэтийн зорилго юу байна? Мэдээж үйл ажиллагаагаа илүү өргөн хүрээтэй болгох байх?

Манай компани ерөнхийдөө зургаан хүний бүрэлдэхүүнтэй ажиллаж байна. Цаашид  компаниа улам өргөжүүлэн, тэлэх бодолтой байгаа бөгөөд ингэхийн тулд сайн бүтээгдэхүүн хийж зах зээл дээр гаргах шаардлагатай байгаа юм.  “Инкубатор” төслөөс гарсан хойноо өөрсдийгөө бие даагаад аваад явах чадвартай болох ёстой гэдэг үүднээс хичээж ажиллаж байгаа.

-Программ хангамжийн чиглэлийн олон компани бий болж байна. Танай компаний хувьд эдгээрээс юугаараа давуу талтай вэ?

Манай компаний инженерүүд гадаадад сургууль төгссөн хүмүүс байгаа. Тиймээс бусдаас хурдтай, чанартай, чадвартай бүтээгдэхүүн гаргаж чадна гэдэгтээ итгэлтэй байдаг. Хийж байгаа ажлууд ч минь ч гэсэн үүнийг харуулж чадаж байна. Гэхдээ бусад компаниудад сайн хүмүүс байгааг үгүйсгэж болохгүй. Бид бүгдээрээ л МТ-ийн хөгжлийн төлөө зэрэг алхаж байна.

-Танай компанитай хамтарч ажиллахаар бол ямар замаар холбогдох вэ?

Манай фэйсбүүк хаяг болох alchemist.mn рүү орж үйл ажиллагааны чиглэлтэй танилцаж, бидэнтэй хамтарч ажиллахаар бол бид таатай хүлээж авах бөгөөд чанартай үйлчилгээ үзүүлнэ гэдэгтээ итгэлтэй байна. Ийшээ орд бидний талаар дэлгэрэнгүй мэдээлэл авч, холбогдож болно.

-Танай компани хэрэгжүүлж байгаа төслүүд дээрээ хөрөнгө оруулагч авах уу?

Бид хэрэгжүүлж байгаа төсөл дээрээ хөрөнгө оруулагч авах бүрэн боломжтой. Манай сайт дээр сурталчилгаа байрлуулж болно. Мөн манай төслүүдийг тусад нь салгаад компани болгох боломжтой. Ерөнхийдөө хөрөнгө оруулагчдад нээлттэй ажиллах болно. Үүнээс гадна манай компани үүсгэн байгуулагдсан цагаасаа эхлэн дөнгөж сургуулиа төгссөн залууст нээлттэй байж зааж, сургаж гаргасан байгаа. Мөн биднээс суралцах хүсэлтэй залуус “Инкубатор”-аар дамжуулан манай компанид ирж дадлага хийх бүрэн боломжтой байгаа.

– Ярилцсанд баярлалаа. Мэдээллийн эх сурвалж: http://news.zindaa.mn/1ora

Дэлгэрэнгүй мэдээллийг http://www.alchemist.mn/ сайтаас аваарай.