UNDP in Mongolia – НҮБ-ын Хөгжлийн хөтөлбөр-с санаачилсан “Тогтвортой хөгжлийн зорилгуудын нөлөөллийн стандарт” (SDG Impact Standards)-ыг танилцуулах, байгууллагын түвшинд тогтвортой хөгжил, тогтвортой хөгжлийн зорилгуудад суурилсан бодлого, стратеги, үйл ажиллагааны удирдлагын арга барилыг хэрэгжүүлэх тухай сургалт МТҮП-д боллоо. Сургалтад МТҮП-ын удирдлага, ажилчид, инкубатор компаниуд хамрагдаж, сургалтыг ШУТИС-ийн багш Ц.Мөнхтуяа удирдан явууллаа.
МТҮП нь цаашид “Тогтвортой хөгжлийн нөлөөллийн стандарт”-ыг байгууллагадаа хэрэгжүүлэх, тус стандардыг гарааны компаниуд хэрэгжүүлж бизнесээ тогтворжуулахад нь гүүр болох, мөн МТҮП-ын “Тогтвортой Хөгжлийн Стратеги Төлөвлөгөө”-г боловсруулж технологийн салбарт тогтвортой хөгжлийн түүчээлэгч болж ажиллах суурь ийнхүү тавигдаж байна.Тогтвортой хөгжлийн зорилгууд нь 2030 он хүртэлх дэлхийн хөгжлийн хөтөлбөрийн хүрээнд НҮБ-аас баталсан 17 зорилго, 169 зорилт бүхий ядуурлыг арилгах, эх дэлхийгээ хамгаалах, хүн төрөлхтөн амар амгалан, хөгжил цэцэглэлтийг үр шимийг хүртэхэд чиглэсэн үйл ажиллагааны дэлхийн хэмжээний зорилт юм. Тус зорилтуудад дэлхий нийтийн өмнө тулгамдаж буй нийгэм, эдийн засаг, байгаль орчны асуудлуудыг хамран авч үздэг. Тогтвортой хөгжлийн зорилгуудын нөлөөллийн стандарт нь дээрх зорилгуудыг хэрэгжүүлэхдээ байгууллага, улс орон болон хувь хүмүүс ямар арга хэмжээ авах, үр дүнг хэрхэн хэмжих, үнэлэх талаар удирдамж өгөхөд чиглэсэн байдаг.
