МТҮП нь Шинжлэх ухаан, мэдээллийн технологийн Шинэ болон Шинэлэг санааны Анхдагч болов

Мэдээллийн технологийн үндэсний парк нь байгуулагдсан цагаасаа эхлэн өнөөдрийг хүртэл Монгол Улсад мэдээллийн технологийн хөгжлийн түүчээ болж шинэ санаа, шинэ технологид суурилсан инновацийг хөгжүүлэхийг зорьсон компани болон иргэнд ажлын байрны таатай орчин, менежментийн иж бүрэн дэмжлэг туслалцаа үзүүлэн, инновацид чиглүүлж, үндэсний брэнд бүтээгдэхүүн үйлдвэрлэх, дотоод, гадаадын зах зээлд өрсөлдөх чадвартай болгоход анхаарч, бизнес инкубаторыг ажиллуулж мөн  бүтээгдэхүүн үйлчилгээний судалгаа, хөгжүүлэлтийг дэмжих замаар өндөр технологийн хөгжлийг идэвхжүүлэх, үр ашигтай хамтын ажиллагааг өргөжүүлэх, шинэ технологи бүтээх, дамжуулах цогц систем бүрдүүлэх, гарааны бизнесийг дэмжих, хөрөнгө оруулалт татах, энтрепрёнер тогтолцоог бүрдүүлэх чиглэлээр  ажилласаар ирсэн билээ.

Мэдээллийн технологийн үндэсний парк нь өндөр технологи, инновацид суурилсан компаниудыг олноор бий болгох, энтрепрёнерүүд төрүүлэх, их, дээд сургуулиудын судалгаа, боловсруулалтын ажлыг эрчимжүүлэх, дэмжих цогц орчинг бүрдүүлэх  зорилгоор улам илүү өргөжин цар хүрээгээ тэлж 2016 оны 03 сарын 03-ны өдөр  “ШИНЖЛЭХ УХААНЫ ПАРК-МЭДЭЭЛЛИЙН ТЕХНОЛОГИ” нэртэйгээр үйл ажиллагаагаа үргэлжлүүлэхээр боллоо.

Нээлтийн арга хэмжээнд  УИХ-ын гишүүн, Монгол Улсын Ерөнхий сайд Ч.Сайханбилэг, БСШУЯ-ны сайд Л.Гантөмөр, ШУТИС, МУИС, ХААИС-ийн удирдлагууд  болон бусад албаны хүмүүс оролцов.

Ийнхүү МТШУПарктай болсноор:

• “Старт-ап” буюу шинээр компани байгуулахад шаардлагатай бүх төрлийн сургалт, зөвлөгөө авах
• Монгол Улсын эрдэмтэн, судлаачдын мэдээлэл, эрдэм шинжилгээний ажлын тайлан, диссертацыг агуулсан оюуны сангаас авч ашиглах
• Хөрөнгө оруулагч, бизнесийн хамтрагчаа олоход нь зуучлах
• Паркийн сүлжээнд байгаа нээлттэй лабораториудыг ашиглах, туршиж үзэх
• Өөрийн бий болгосон оюуны өмч, технологи, бүтээгдэхүүнээ хамгаалах, ашиглахтай холбоотой хууль эрхзүйн зөвлөгөө болон үйлчилгээг иж бүрнээр авах
• Дэлхийн шилдэг хамтрагч  (MIT, TUS Park, Beijing Univ, Япон, Солонгос болон Европын холбооны шилдэг ИС-иудын консорциум зэрэг)-тайгаа ажиллах
• Оюутан, эрдэмтэн судлаачид, залуу авьяасууд нэг дор төвлөрөх бөгөөд гадаад дотоодын бизнес эрхлэгчид, хувийн хэвшилтэй нээлттэй нягт хамтран ажиллаж бүтээгдэхүүн, технологийн хөгжүүлэлт хийж, БРЭНДЭЭ бүтээх боломж НЭЭЛТТЭЙ болж байгаагаараа онцлог юм.