Top Gun Training хөтөлбөрт оролцогчдын сэтгэгдэл

Оролцогч Э.Энхбаяр

Миний нэрийг Э.Энхбаяр гэдэг. Би “Эффишэнт Вэй” ХХК-д хөгжүүлэлт хариуцсан дэд захирлаар ажилладаг.

МТ-ийн инженерийн шалгалт нь бусад мэдээллийн технологийн шалгалтуудыг бодвол бүх чиглэлийг хамарсан нь мэдээлэл технологийн ерөнхий мэдлэгийг шалгахад илүү үр дүнтэй санагдсан. Мэдээллийн технологийн инженерийн шалгалтаар өөрийгөө сорьж, хэрвээ тэнцвэл цаашид мэргэшсэн инженерийн шалгалтыг өгөхөд хэрэгтэй гэж бодоод өгсөн. Нийт 200 оноо авахаас 156.5 оноо авсан.

Тус шалгалтанд тэнцсэнээр МТ-ийн мэргэшсэн болон зөвлөх инженерийн болзолыг хангаж байгаа. Шалгалтын давуу талын хувьд бусад гишүүн орнуудад ажиллах, ялангуяа Японд мэдээллийн технологийн чиглэлээр ажиллах сонирхолтой хүмүүсийн хувьд Япон улсад хэрэглэгддэг энэ шалгалтыг өгсөн бол мэргэжлээрээ ажиллах боломж нээлттэй байна.

Тус хөтөлбөрт ITPEC-ийн зардлаар Япон улс руу 11 хоногийн хугацаатай оролцоод ирсэн. “Top Gun Training” нэртэй энэ хөтөлбөр нь Японы мэдээллийн технологийн хөгжил, бодлоготой танилцах, мэдээллийн технологийн компаниудын үйл ажиллагаа, ажиллах хэв маяг, шинэ судалгаа, хөгжүүлэлттэй танилцан, зарим төрлийн сургалтуудыг агуулсан байдаг. Энэхүү хөтөлбөрт Азийн 7 орны 14 оролцогч хамрагдсан. Хөтөлбөрийн хүрээнд Японы технологийн хамгийн том компани болох NTT корпораци, NEC корпораци, Япон улсын эдийн засаг, худалаа үйлдвэрлэлийн яам, хамгийн сүүлийн үеийн технологийг ашиглан байгуулсан Датацентр, Токио хотын кабелийн туннелийн систем, шинэ технологийн музей гэх мэт олон газраар зочилж, ажилтан, албан хаагч, инженер техникийн ажилчидтай нь уулзан, туршлага хуримтлуулаад ирлээ.

space

Оролцогч Д.Дэлэг

Намайг Долгорсүрэнгийн Дэлэг гэдэг. Би Монгол Улсын Их Сургуулийн Хэрэглээний Шинжлэх Ухаан, Инженерчлэлийн сургуулийн төгсөх курсын оюутан.

МТҮП-д Азийн 12 оронд хүлээн зөвшөөрөгддөг МТ-ийн инженерийн шалгалтыг эх орондоо өгөх нөхцөлийг бүрдүүлж, бусад орнуудтай нэг өдөр, нэг цагт, нэгэн зэрэг авч байгаад нь талархаж байна. Мөн шалгалтанд бэлтгэх сургалтыг явуулдаг бөгөөд сургалт нь  шалгалтын агуулгыг бүрэн багтааж, өргөн сэдвийг хамарч чаддаг.

Тус шалгалтыг өөрийн сурч, мэргэшиж буй чиглэлийн мэдлэг, чадварыг сорих зорилгоор өгсөн. Нийт 200 онооноос 153 оноо авч тэнцсэн.

Анх их сургуульд орж байхад манай тэнхимийн багш нар энэхүү шалгалтын тухай, мөн түүний давуу тал болон боломжуудын талаар ярьсан. Тэр үеэс л ахлах курсэд ороод өгнө гэж бодогдсон. МТ-ийн инженерийн шалгалт нь өөрийн мэргэжлийн мэдлэг, чадварыг бататгах нэг боломж бөгөөд цаашлаад мэргэжлээрээ япон улсад хөдөлмөр эрхлэхэд нааштай хүлээж авдаг гэж сонссон.

Өнгөрсөн 2015 оны хавар болон намрын МТ-ийн инженерийн суурь шалгалтанд хамгийн өндөр оноотой 2 тэнцэгч энэ жил хоёр дахь удаагаа зохиогдож буй “Top Gun Training” хөтөлбөрт хамрагдан, Япон улсын МТ-ийн чиглэлээр үйл ажиллагаа явуулдаг томоохон компаниудтай танилцан, туршлага солилцоод ирлээ. Энэ жилийн сургалт нь 2 сарын 22-оос 3 сарын 2-ны хооронд зохион байгуулагдсан. Энэхүү сургалтын хүрээнд Япон улсын томоохон компаниуд болох NTT Communications Corp болон NEC Solution Innovators Ltd компаниудын үйл ажиллагаатай танилцаж, тэнд ажилладаг инженерүүдийн бидэнд тусгайлан зориулсан сургалтанд хамрагдсан. Мөн Токиогийн 6-р Дата центр, 50 метр газар доорх кабелийн туннел болон Шинжлэх Ухааны музей Мирайканаар аялаад ирсэн.

Цаашид тус шалгалтыг өгөхөөр зэхэж буй залуусдаа хандаж хэлэхэд бэлтгэх сургалтанд нь идэвхитэй хамрагдан, шалгалтаа амжилттай өгөхийг уриалж байна.