IT-ийн эмэгтэйчүүд инкубаторт бойжиж бизнесээ эхлүүлэхийг хүсч байна

МТШУП нь “Мэдээллийн технологийн эмэгтэйчүүдийн бизнес инкубатор” төслийг амжилттай үргэлжлүүлж байгаа бөгөөд инкубаторын сонгон шалгаруулалтанд амжилттай бэлтгэхэд зориулсан семинарын эхний сургалтыг  2016 оны 03-р сарын 28-нд 217 тоот “Coworking Space 2” өрөөнд  зохион байгууллаа.

Энэ удаагийн эмэгтэй инкубаторт элсэхийг сонирхож буй мэдээллиийн технологийн чиглэлээр мэргэжил эзэмшсэн 4 эмэгтэй сонгон шалгаруулалтанд оролцохоор манай инкубаторыг зорин ирсэн бөгөөд Инкубаторт элсэх журам, Эмэгтэй инкубаторын төслийн үйлчилгээний цар хүрээ, бизнес төлөвлөгөө хэрхэн бичих зэрэг шалгаруулалтыг амжилттай хамгаалахад юуг анхаарах талаар дэлгэрэнгүй мэдээлэл авав.

Шалгаруулалтыг амжилттай хамгаалахын тулд МТШУП-ийн мэргэжилтнүүдийн өгч буй семинарт хамрагдаж илүү их мэдээлэлтэй байж бэлтгэл сайтай орно. Магадгүй бизнес санаагаа сайн төлөвлөж, түүнийгээ сайн илтгэж чадвал шалгаруулалтанд оролцогчдын талд шүүгчид “кноп”-оо дарах нь мэдээж.

Тиймээс мэдээллийн технологийн  шинэ санаа, шинэ технологийн зах зээлд өрсөлдөх чадвартай, бизнес эрхлэх чин хүсэлтэй эмэгтэйчүүдэд энэхүү инкубаторын үйлчилгээ нь тэднийг мэргэжлээрээ зах зээлд бие даан ажиллах боломж олгодгоороо онцлогтой ба элсэгчдэд зориулсан 2 дахь семинар 4-р сарын 4-ний 10.00 цагт “Coworking Space 2”-т дахин зохион байгуулагдах тул сонирхсон хүмүүс оролцох боломжтой юм.

Инкубаторт элсэгч байгууллага, иргэн Таны мэдээллийн технологийн шинэ санааг дэмжиж бизнес болгох, үйл ажиллагааг хөнгөвчлөх, бүтээгдэхүүний чанарыг эрс нэмэгдүүлэх, энэ чиглэлийн эмэгтэй удирдагчтай компанийг олноор төрүүлэх, шинэ брэнд бүтээгдэхүүнийг дотоод, гадаадын зах зээлд нэвтрүүлэхэд тань МТШУП-ийн хамт олон бүх талаар тусална.

Манай инкубаторыг зорин ирсэн хүсэл тэмүүлэл дүүрэн эмэгтэйчүүдийгээ 2 дахь шатны семинарт хамрагдахыг мөн 7 багц үйлчилгээний хөнгөлөлттэй гарааны компанийг дэмжих Инкубаторын 27 дахь удаагийн шалгаруулалтанд өргөнөөр оролцохыг урьж байна.

Дашрамд дурдахад манай “Эмэгтэйчүүдийн бизнес инкубатор”-ын анхны элсэгч Н.Даваасүрэн захиралтай “Марчаахай” ХХК нь хүүхдэд зориулан дуу, шүлэг, үлгэр, танин мэдэхүй гэсэн 4 төрлийн контент бүтээж байгаа бөгөөд хэдийнээ олонд танигдсан, 80 гаруй контентыг зах зээлд нэвтрүүлээд байгааг дуулгахад таатай байна.

Ийнхүү МТШУП-аас хэрэгжүүлж буй “Эмэгтэй инкубатор”-ын үйлчилгээ үр дүнгээ өгч эхэллээ.