“Монгол инноваци” цуврал уулзалт боллоо

Дэлхийн улс орнууд мэдлэгт суурилсан эдийн засгийг хөгжүүлэх, инновацийг бүтээх замаар эдийн засгаа тэлэх бодлогыг баримталж байгаа энэ цаг үед монгол орон яг хаана явна вэ? Аж үйлдвэрийн 4 дэх хувьсгал аль хэдийн эхэлчихсэн гэгдэж буй энэ үед бидэнд энэ асуудлаарх нэгдсэн бодлого үгүйлэгдсэн хэвээр.

Инновацийн, гарааны бизнесийн эко системийн бүрдүүлэгч оролцогч талуудын хооронд мэдээлэл солилцох, харилцан ойлголцох, гарааны компаниудад тулгарч буй хууль эрх зүй, нийгэм соёлын болон хөрөнгө оруулалт, санхүүгийн асуудлуудын талаар хэлэлцэх зорилго бүхий “Монгол Инноваци” цуврал уулзалтыг МТҮП-аас анх удаа санаачлан зохион байгуулж эхэллээ.

Төр, олон нийт, санхүүгийн байгууллагууд болон гарааны бизнесүүдийн төлөөллийг оролцуулж, цаашдаа уулзалтаас санал зөвлөмж гарган, хөгжлийн бодлогын зөвлөмж гаргах зорилттой энэхүү цувралын эхнийх нь “Инновацийн эко систем” нэрийн дор 2016 оны 09 дүгээр сарын 29-ний өдөр зохион байгуулагдсан юм.

Уг цуврал уулзалтын хүндэт зочин нь УИХ-ын гишүүн Д.Гантулга байлаа. Тэрээр хэлэлцүүлгийн үеэр мэдээллийн технологийн салбарыг хөгжүүлэх төрийн нэгдсэн бодлогыг боловсруулах, татварын таатай орчныг бий болгох, хууль эрхзүйн зарим зохицуулалтыг гаргах талаар болон УИХ дахь лобби бүлгийг байгуулах талаар өөрийн санал бодлоо хуваалцсан ба тэрээр энэ төрлийн хэлэлцүүлгүүдийг тогтмол зохион байгуулж, цаашдаа олон төрийн түшээд, оролцогч талуудыг оролцуулан, мэдээллээр хангах, хамтран ажиллах боломжийг бий болгохын ач холбогдлыг онцгойлон дурдлаа.

Мөн хэлэлцүүлэгт МТҮП-ийн Инкубатор, бизнес хөгжүүлэлтийн төвийн дарга П.Наранцэцэг инкубатор төвийн үүсэл хөгжил, өнөөгийн байдал болон цаашдын хандлагын талаар мэдээлэл илтгэлийг хийсэн юм. МТҮП-ийн бойжиж буй 17 компанийн төлөөлөл болох Алхемист, Дэмжлэг, Марчаахай болон Мирим Консалтинг компанийн захирлууд гарааны бизнесүүдэд тулгарч буй түгээмэл бэрхшээл, олон улсын зах зээлд гарах боломж, тэдгээрийг шийдвэрлэх боломжуудын талаар сонирхолтой илтгэлийг хэлэлцүүлсэн. Үүнээс гадна санхүүгийн байгууллагын төлөөлөл болон үндэсний үйлдвэрлэлийг дэмжигч Улаанбаатар Хотын Банкны байгууллагын банкны ахлах зээлийн эдийн засагч Ц.Баттөгс гарааны компанидын зээл авах боломж, шалгуур үзүүлэлтүүд болон түгээмэл гаргадаг алдаануудын талаар мэдээлэл өгсөн нь хэлэлцүүлэгт оролцогчдод ихээхэн хүртээмжтэй байлаа.

МТҮП нь энэхүү уулзалтыг цаашид цуврал болгон зохион байгуулах бөгөөд уулзалтын үр дүнг нэгтгэсэн тайланг олон нийтэд нээлттэй байдлаар бэлтгэн хүргэх болно.