“Монгол инноваци 2” цуврал хэлэлцүүлэг боллоо

МТҮП “Монгол инноваци” цуврал хэлэлцүүлгийг санаачлан анхны уулзалтыг зохион байгуулсан ба энд хөндөгдсөн сэдвээр “Бодлогын зөвлөмж” гаргасан билээ.

Уг зөвлөмжид тусгагдсан 2 дах хэлэлцүүлэг “Гарааны бизнес-Татварын хөнгөлөлт, чөлөөлөлтийн эко бүс байгуулах” сэдэв байж 11-р сарын 01-ний өдөр амжилттай болж, инноваци үйлдвэрлэгч инкубаторын захирлууд тун сонирхолтой олон сайхан санааг дэвшүүлсэн илтгэлүүдийг тавилаа.

Гарааны бизнесийн эко орчин бүрдүүлж, мэдлэгт суурилсан эдийн засгийг бий болгоход салбарын хэмжээний хөгжлийн чиг хандлагыг тодорхойлох улмаар улс төрийн лобби бүлэг байгуулж түүгээр дамжуулж хууль эрх зүйн таатай орчинг бүрдүүлэх нь хэлэлцүүлгийн гол зорилго юм.

Энэ удаагийн “Монгол инновац-2”-ийн хүндэт зочин-төрийн буухиа элчээр УИХ-ын гишүүн, Төсвийн зарлагын хяналтын дэд хорооны дарга Загдхүүгийн Нарантуяа хүрэлцэн ирэх байсан боловч “2017 оны төсвийн нээлттэй хэлэлцүүлэг” давхацсан тул гишүүний бие төлөөлөгч, зөвлөх М.Отгонбаяр, паркийн инкубаторын шилдэг төгсөгч “Болорсофт” ХХК-ийн захирал С.Бадрал /ХБНГУ-аас түр хугацаагаар эх орондоо ирсэн/ инкубаторын компаниудын илтгэл болон мэдээллийн технологийн салбарт тулгамдаж байгаа асуудлыг хамтдаа хэлэлцэхээр урилгыг маань хүлээн авч хүрэлцэн ирсэн юм.

С.Бадрал захирал Герман улсын гарааны компанийн хөтөлбөрт хамрагдан европын зах зээлд хэрхэн ажиллаж, санхүүжилт босгож буй талаар өөрийн туршлагаа хуваалцлаа. Түүний хэлж буйгаар таны хамгийн “тэнэг” санаа л өөрөө инноваци гэсэн тодорхойлолт арга хэмжээг зорин ирсэн 50 гаруй залуусын сонирхлыг татлаа.

Энэ мэт оюуны бүтээл үйлдвэрлэгч залуус харилцан мэдлэгээ хуваалцаж, цаашид төр, засгаас хүсч, дуулгах гэсэн олон сайхан санаа, бодлоо зөвлөх М.Отгонбаярт уламжилсан юм. Зөвлөх маань ч “Гишүүн Нарантуяа 100% та бүхний хүсэлтийг дэмжиж, хамтран ажиллахад бэлэн байгаа” гэдгийг дуулгаад “Маш хүсэл тэмүүлэлтэй оюуны өндөр чадамжтай залуусын хөдөлмөрийг үнэлж, бүхий л санаа оноог дэмжин хүлээн авлаа. Дэвшүүлж тавьсан санаануудыг гишүүндээ бүрэн илэрхийлнэ” гэдгээ ч залуусын өмнө амлав.

Эндээс олон шинэлэг санаанд хүрч, мэдээллийн технологийн зах зээлд том том инновацийг дотооддоо төдийгүй гадаадад нэвтрүүлж, Монголын эдийн засгийг босгох нөөц боломж манай Ай Ти-гийн компаниудад байна гэдгийг онцолсон захирлуудын байр суурь М.Отгонбаяр зөвлөх болон оролцогч залууст итгэл төрүүлж чадсан юм.

Инкубаторын “Ээж” ХХК-ийн захирал О.Ундрам энэ зун Орос, Хятадын инкубаторын төвтэй танилцаад ирсэн байна. Манай Улаанбаатар хотын маань хэмжээнд дөхөхүйц инкубаторын бүхэл бүтэн хотхон тус улсуудад ажиллаж, төр засгаас бодлогын хэмжээнд дэмждэг талаар аялалын маршрутын сониноосоо дуулгав.

Дэлхий нийтээр мэдлэгт суурилсан эдийн засгийг хөгжүүлэхийг эрхэмлэж байгаа өнөө цагт олон улс оронд аж үйлдвэрийн 4 дэх хувьсгал гараанаасаа хэдийн нь хөдөлсөн гэдгийг олон улсын мэдээллийн сувгаар цацагдсныг бид мэдэж байгаа.

Тэгвэл дэлхийн улс орнуудын нэгэн адил манай мэдээллийн технологийн салбар хөл нийлүүлэн алхахад Монгол залуусын мэдлэг, оюун, практик, зах зээлийн эрэлт, нийлүүлэлт нь бэлэн боловсрогдсон байгааг онцлоход таатай байна.

Гагцхүү төр, засгийн уул уурхай руу чиглэсэн бодлогоос илүүтэй мэдээллийн технологийн салбар илүүтэй харах нэгдсэн нэг бодлого, авч хэрэгжүүлэх арга зам, дэмжлэг дутагдаж байгааг гарааны компаниудын удирдлагууд бүгд итгэлдээ онцолж байгааг бодлого тодорхойлогч, төсөв, мөнгө хуваарилагч нар сонсож, хүлээн авах цаг нь ирсэн бололтой.

Яагаад дэлхийн өндөр хөгжилтэй орнууд мэдээллийн технологид суурилж хөгжлийг түргэсгэж байна вэ?
Бид хэрхэн өөрсдөдөө боломжуудыг гаргаж өгч чадах бол? Энэ асуултын хариуг бид олон өнцөгөөс тайлбарлаж чадах ч, гарах боломжуудыг огт сонирхож, хэрэгжүүлэх талаар авч үздэггүй нь үнэний талтай.

“Монгол инновац” цувралын 2 дах хэлэлцүүлгийн зорилго УИХ-аар батлагдах гэж байгаа ААНОАТ-ын хөнгөлөлт чөлөөлөлттэй холбоотой асуудал төдийгүй НӨАТ, НДШ, ХХОАТ-аас эхний 3-5 жил бусад орны жишгийн адил чөлөөлөгдөх асуудлыг хөндөж улмаар оюуны өмчийн үнэлгээг барьцаалж банкны зээл олгох боломж, хөрөнгө оруулалт, санхүүтэй холбоотой цогц асуудлаар ай ти хөгжүүлэгчдийн байр сууриа илэрхийлэх индэр байж чадлаа.

Та бидний өнөөдрийн их үйл хэрэг өгөөжтэй, сайн сайхан зорилгод нэгдэнэ гэдэгт итгэлтэй байна.

3 дахь хэлэлцүүлгээр “Гарааны компани-Хүний нөөцийн хар хайрцагны бодлого” сэдвийг хөндөх ба хүн бүрт нээлтэй энэхүү арга хэмжээнд та бүхнийг урьж байна