Мэдээллийн технологийн хүний нөөцийг чадваржуулах 3 дах олон улсын шалгалтыг МТҮП нутагшуулна

Олон улсын ТОПСИТ шалгалтын эрхийг МТҮП-т олгосны дагуу тус шалгалтыг Монголд нутагшуулах анхны шалгалтыг 2017 оны 2-р сард зарлаж албан ёсоор зохион байгуулах боллоо.

Бэлтгэл ажлын хүрээнд манай мэдээллийн технологийн салбарын төлөөлөл БНСУ-ын Мэдээлэл, харилцаа холбооны технологийг дэлгэрүүлэх институц /Institute for Information and Communications Technology Promotion/-ын урилгаар тус улсад албан томилолтоор ажиллаад ирлээ.

Томилолтын багт Харилцаа холбоо, мэдээллийн технологийн газрын Радио, телевиз, нийгмийн мэдээллийн сүлжээний бодлого, зохицуулалтын  хэлтсийн дарга Р.Эрдэнэбилэг, МТҮП-ын ИБХТ-ийн дарга П.Наранцэцэг, Мэдээллийн технологийн бодлого, зохицуулалтын хэлтсийн мэргэжилтэн С.Ануужин нар багтсан юм.

Томилолтын зорилго нь Глобал ТОПСИТ-ын хуралд оролцонгоо хоёр орны мэдээллийн технологийн салбарын хамтын ажиллагааны чиглэлийг тодорхойлох, ТОПСИТ шалгалтын төвийн үйл ажиллагааг жигдрүүлэх, салбарын хүний нөөцийг хөгжүүлэх, хамтын ажиллагааг өргөжүүлэх  зэрэг ажил хэргийн уулзалтыг товложээ. Төлөөлөгчид ТОПСИТ шалгалтыг цахим засагтай хэрхэн уялдуулах, олон улсын цахим засгийн хэрэгжилтийн талаар харилцан туршлага солилцож, хэлэлцүүлэгт оролцсон байна.

Томилолтын ажлын хэсгийн гишүүдийн гаргасан Монголын талын саналыг солонгосын тал дэмжин ажиллах боллоо. Солонгосын МХХТДИ нь контент хөгжүүлэлт, цахим засаг, хүний нөөцийг хөгжүүлэхэд илүү анхаарч, асар их ач холбогдол өгдөг нь анзаарагдав. Ганц жишээ дурдахад, Монголоос мэдээллийн технологийн салбарын боловсон хүчинг сургахад дэмжлэг үзүүлэх болжээ. Ингэснээр манай мэргэжилтнүүдээс БНСУ-ын SNU, KAIST-ийн их сургуульд мастер, доктор хамгаалах боломжтой болж 100%-ийн тэтгэлэгт хөтөлбөрт хамрагдах юм. Мөн манай МТҮП-т “Судалгааны төв”-ийг ажиллуулахад онцгойлон анхаарал тавьж ажиллах гэнэ.

Хамгийн гол асуудал болох олон улсын ТОПСИТ-ын албан ёсны шалгалтыг 2017 оны I улиралд багтаан МТҮП дээр зохион байгуулах болсонтой холбогдуулан БНСУ-ын МХХТДИ-ийн Ерөнхийлөгчөөр ахлуулсан багийнхан 2017 оны 2-р сард айлчлан манай Агентлагын удирдлагуудтай уулзах хүсэлтээ илэрхийлсэн байна.

Түүнчлэн Ажлын хэсгийн гишүүд NIPA-ийн Дижитал контентийг дэлгэрүүлэх газрын Дэд захирал Жэйсон Шинтэй уулзаж байгууллагын үйл ажиллагаатай танилцан, хамтран ажиллах саналыг Харилцаа холбоо, мэдээллийн технологийн зүгээс тавьжээ. NIPA-ийн удирдлага  хамтран ажиллах өмнөх уламжлалаа сэргээх хүсэлтийг дэмжиж буйгаа илэрхийлж манай салбарын үйл ажиллагаатай газар дээр нь танилцаж улмаар хамтран ажиллахад бэлэн байгаагаа уламжилсан байна.