Хөгжлийн бэрхшээлтэй хүүхдүүдийн мэдээлэл, технологийн улсын анхдугаар олимпиадыг тэргүүлэгчид олон улсад өрсөлдөнө
Манай улс хүүхэд залуусынхаа ерөнхий эрдмийн боловсролыг дэмжиж монгол хэл, математик, физик, хими, байгалийн ухааны хичээлээр жил бүр олимпиад зохион байгуулж, мэдлэг, ур чадвараар нь эрэмбэлж улмаар олон улсын олимпиадад оролцуулдаг уламжлалтай билээ. Харин энэ жилийн хувьд хөгжлийн бэрхшээлтэй хүүхдүүдэд мэдээлэл, технологийн чиглэлээр эх орондоо төдийгүй олон улсын олимпиадад өрсөлдөх боломжтой боллоо.
Хөгжлийн бэрхшээлтэй хүүхдүүдийн мэдээлэл, технологийн Улсын анхдугаар олимпиадад оролцогчид 13-18 насныхан байсан ба нийслэлийн 6 дүүрэг, тусгай боловсролын 5 сургууль, хөдөө орон нутгийн 12 аймгаас шалгарсан 34 сурагч мэдлэг, ур чадвараа сорьсон бол олимпиадын хамгийн бага нь 13 настай сурагч байв.
Мэдээлэл, технологийн улсын анхдугаар олимпиадыг Хөдөлмөр, нийгмийн хамгаалалын яам, Сэргээн засалт, сургалт, үйлдвэрлэлийн төв хамтран 2017 оны 5 дугаар сарын 1-нд МТҮП-ийн сургалтын танхимд амжилттай зохион байгуулж олимпиадын дүнгээ гаргалаа.
Хөгжлийн бэрхшээлтэй хүүхдүүдийн Улсын анхдугаар олимпиадад 4 хүүхэд шалгарч Вьетнам Улсад 9 дүгээр сарын 18-22-ны өдрүүдэд зохиогдох Олон улсын Мэдээлэл, технологийн олимпиад оролцох эрхтэй болж Монголынхоо нэрийг олон улсын тавцанд гаргах юм. Энэхүү анхны олимпиадад Ховд аймгаас оролцсон Отгон-Эрдэнэ, Хэнтий аймгийн “Тэмүүжин” цогцолбор сургуулийн сурагч Цолмон-Од, Сүхбаатар дүүргийн тусгай 116-р сургуулийн сурагч Лхамсүрэн, Сэргээн засалт, сургалт, үйлдвэрлэлийн төвийн оюутан Төгсжаргал нар тодорч эхний байруудын медалийг сургуульдаа болон өөртөө авчирч чадлаа.
Хөгжлийн бэрхшээлтэй хүүхэд залуучуудын дунд анх удаа Мэдээлэл, технологийн олимпиад зохион байгуулж байгаа нь тэдний боловсон хүчин хүний нөөцийг чадваржуулж, мэдээлэл, технологийн мэдлэгийг бүх нийтийн болгож өргөжүүлэх, техник технологийн онол, практикийн хөгжлийг дэмжих зорилготой. Олимпиадын нээлтийн арга хэмжээнд олимпиад зохион байгуулах комиссын урилгаар Хөдөлмөр, нийгмийн хамгааллын яамны дэд сайд С.Мөнгөнчимэг, Сэргээн засалт, сургалт, үйлдвэрлэлийн төвийн Ц.Ганчимэг, дэд дарга В.Алтансүх, Мэдээлэл, технологийн үндэсний паркийн захирал Ц.Содномдорж, МТҮП-ийн Захиргаа, удирдлагын хэлтсийн дарга Г.Мөнхсүх, Нийслэлийн Засаг даргын Тамгын газар, БЗД-ийн Засаг даргын Тамгын газар, “Дэлхийн зөн” олон улсын байгууллага, ДЭМБ-ын төлөөлөгчид хүрэлцэн ирсэн юм.
Энэ жилийн олимпиад “Мэдээлэл, технологийн сорилт-Монгол” сэдэв дор болсон бөгөөд төр, засгаас хөгжлийн бэрхшээлтэй хүүхдүүдэд мэдээлэл, технологийн цахим бичиг үсгийн боловсрол олж авахад анхаарч байгаагийн нэгэн жишээ төдийгүй манай байгууллагын хувьд хамтран оролцсоноор нийгмийн өмнө хүлээсэн байгууллагын хариуцлага дээшилж байгаа билээ.
- 2017-05-02
- Уншсан:16874
- Tags: мэдээлэл, технологийн олимпиад
Сүүлийн мэдээнүүд
-
4 Jul 2024
