Мэдээлэл, технологийн үндэсний парк (МТҮП) нь Монгол Улсад мэдээллийн технологийн суурь мэдлэг, ур чадварын стандарт болон ур чадварын түвшинг тогтоох олон улсын шалгалтын системийг амжилттай нутагшуулсан төдийгүй цаашид бүх нийтийн цахим мэдлэгийг сайжруулахад дэмжлэг үзүүлэх зорилго тавин ажиллаж байна.
Энэхүү зорилгын хүрээнд Харилцаа холбоо, мэдээллийн технологийн салбарын 100 жил, Мэдээлэл, технологийн үндэсний паркын 50 жилийн ойг угтан Мэдээллийн технологийн инженерийн шалгалтын 1 дэх түвшин болох “Мэдээллийн технологийн паспорт шалгалт”-д бэлтгэх гарын авлагыг ажил албандаа мэдээллийн технологийг ашигладаг хүн бүрт зориулан орчуулан гаргалаа.
Гарын авлага нь монгол хэлээр нийтлэгдэж буй анхны хэвлэл бөгөөд бүтцийн хувьд стратеги, удирдлага, технологийн салбар тус бүрээр арван бүлгийг дараах байдлаар багтаасан болно.
Бүлэг 1: Байгууллага ба хууль эрх зүй
Бүлэг 2: Бизнесийн стратеги
Бүлэг 3: Системийн стратеги
Бүлэг 4: Систем хөгжүүлэх технологи
Бүлэг 5 Төслийн удирдлага
Бүлэг 6 Үйлчилгээний удирдлага
Бүлэг 7 Суурь онол
Бүлэг 8 Компьютерын систем
Бүлэг 9 Технологийн элемент
Бүлэг 10 Хүснэгтэн мэдээлэл боловсруулах программ
Хавсралт: Мэдлэг шалгах асуултын хариулт болон тайлбар
Энэхүү гарын авлагыг орчуулан гаргах санаачилгыг МТҮП-ын захирал Э.Цогтгэрэл, төслийн удирдлага, сургалт, маркетингийн хэлтсийн дарга П.Наранцэцэг нар гарган Япон улсын Мэдээллийн технологийг дэмжих агентлагаас албан ёсоор орчуулах эрхийг авсан билээ. Гарын авлагыг МТҮП-ын гадаад харилцааны мэргэжилтэн Н.Мөнхбаяр болон Шинжлэх ухаан, технологийн их сургуулийн багш Ц.Батцэцэг, Б.Мөнхчимэг, Л.Болор нар англи хэлнээс монгол хэл рүү орчуулах ажлыг гүйцэтгэсэн болно.
Ерөнхий редактораар Монгол улсын их сургуулийн Хэрэглээний шинжлэх ухаан инженерчлэлийн сургуулийн Профессор, доктор С.Уянга, Шинжлэх ухаан, технологийн их сургуулийн Мэдээлэл холбоо, технологийн сургуулийн багш, доктор Ч.Мөнхнасан, Э.Батцэцэг болон бусад эрдэмтэн, багш нартаа гүн талархал илэрхийлье.
Монгол улсын иргэн 16 насанд хүрээд иргэний үнэмлэхээ авдаг бол Мэдээллийн технологи гэх салбарт алхан орохын тулд паспорт шалгалтад тэнцэж гэрчилгээ авах нь XXI зуунд ажиллаж буй мэргэжилтэн бүрт тавигдах шаардлага болоод байна. XXI зуунтайгаа хөл нийлүүлэн алхаж буй залуу таны оюун мэлмийн өмнө энэхүү номоо өргөн дэлгэж байна.