“Инноваци малчны хотноос эхэлнэ”

Монгол Улс 2014 оноос жил бүр “Инновацийн 7 хоног” үйл ажиллагааг зохион байгуулж буй бөгөөд энэ жилийнх тавдугаар сарын 17-23-ны өдрүүдэд болох юм. Тус үйл ажиллагааг УИХ-ын Инноваци, цахим бодлогын байнгын хороо БШУЯ, ХХААХҮЯ, Соёлын яам, Харилцаа холбоо, мэдээллийн технологийн газар, Шинжлэх ухаан, технологийн сан, Нийслэлийн шинжлэх ухаан, үйлдвэрлэл, инновацийн газар, Шинжлэх ухааны академи, Их сургууль, эрдэм шинжилгээний байгууллагууд, Залуу судлаачдыг дэмжих сан хамтран зохион байгуулж буй юм.

Үндэсний инновацийн тогтолцоог бэхжүүлэх, инновацийн тэргүүлэх 5 чиглэлийг хөгжүүлэхэд хөрөнгө оруулалт, үндэсний чадавхыг төвлөрүүлэх, мэдлэгийг эдийн засгийн эргэлтэд оруулж, өрсөлдөх чадвартай инновацийн бүтээгдэхүүн, үйлчилгээний төрөл, хэлбэрийг нэмэгдүүлэхэд төр, хувийн хэвшлийн хамтын ажиллагааг чиглүүлэх зорилгоор “Үндэсний инновацийн хөгжил” форумыг зохион байгуулж байна.

Төрийн байгууллага, төр, хувийн хэвшлийн их, дээд сургууль, эрдэм шинжилгээний байгууллага, бизнесийн салбарын 1000 орчим төлөөлөгч оролцож байна.

Боловсрол, шинжлэх ухааны сайд Л.Энх-Амгалан тул үйл ажиллагааг нээж үг хэллээ.
Тэрээр “Инноваци малчны хотноос эхэлнэ. Малчид малынхаа үүлдэр угсааг сайжруулах, ноос ноолуураа дэлхийд өрсөлдөхүйц болгохыг зорьж буй шинэ санаа, сэдэл бүрийг инноваци хэмээж болно. Үүнийг зөвхөн судлаачид хийдэг гэж ойлгож болохгүй. Бидний өдөр тутмын ажил хөдөлмөр, бүтээл, судалгаанд гаргаж буй шинэ санаа бүр инноваци юм. Гэсэн ч Монголчуудыг цахим үндэстэн болгох гол ажлыг инноваци, мэдээлэл технологийн газар нуруундаа үүрч байна. Бид цаашид инноваци шингэсэн бүтээгдэхүүн экспортолдог орон болохын төлөө зорьж байна” гэсэн юм.

УИХ-ын гишүүн, Инноваци, цахим бодлогын байнгын хорооны дарга Н.Учрал “НҮБ-аас гаргасан улс орнуудын мэдлэгийн үзүүлэлтээр Монгол Улс 2019 онд 138 орноос 76-р байранд бичигдэж байсан бол 2020 онд 72-рт орсон. Судалгаа хөгжүүлэлт, инновацийн индексээр 2018 онд 138 орноос 71-рт орж байсан бол 2020 онд таван байраар урагшилж, 66 дугаарт бичигдсэн. Үүнээс харахад уул уурхай, түүхий эдэд тулгуурласан эдийн засгаас аж үйлдвэржилт, мэдлэг мэдээлэлд түшиглэсэн эдийн засагт шилжих шилжилтийг хэрэгжүүлэх, улс орны өрсөлдөх чадварыг дээшлүүлэх, эдийн засгийн төрөлжилтийг сайжруулахад технологи, инновацийн үйл ажиллагааг бүх салбарт нэвтрүүлж, түгээн дэлгэрүүлэх нь олон талын ач холбогдолтойг харуулж байна. Үйлдвэрлэл, үйлчилгээнд дэвшилтэт технологи нэвтрүүлэн ашиглах замаар эдийн засгийг инновацийн чиг баримжаатай хөгжүүлэх нөхцөл бүрдэнэ” гэлээ.

Өнөөдөр салбар хуралдаанууд

• Цахим технологи ба, дижитал шилжилт
• Хөдөө аж ахуйн салбарын шинжлэх ухаан, технологи, инноваци
• Соёлын инноваци, бүтээлч үйлдвэрлэл
• Биотехнологи, анагаах ухаан
• Гарааны бизнесийг дэмждэг үндэсний эко систем зэрэг сэдвээр явагдаж байна.