Нийгмийн сайн сайхны төлөө технологийн дэвшлийг хэрхэн зориулах талаар залуучууд хэлэлцэж байна.

Өнөөдөр  буюу 2014 оны 9-р сарын 22-нд Мэдээллийн технологийн үндэсний паркад Монголд анх удаа Social Good Summit Mongolia 2014 уулзалт болж байна.  Залуучуудын санаачлагаар нийгмийн сайн сайхны төлөө үйлсийг өрнүүлэх, онцлог санаачлага, олон нийтийн байгууллагуудыг таниулах, хэвшмэл байдлыг эвдэх, шинэ үеийн залуусын оролцоо, манлайллыг дэмжих,  шинэлэг сэтгэлгээг дэлгэрүүлэх зорилготой сайн дурын залуучуудын  санаачлагын идэвхтэй оролцоотой 30 гаруй  төрийн бус байгууллагыг нэгтгэсэн Монголын Залуучуудын Эвсэл,Иргэний Боловсролын Төв санаачлан  НҮБ-ын Хөгжлийн хөтөлбөр, НҮБ-ын Хүн амын сан,  Мэдээлэл Технологийн Үндэсний Парк зэрэг байгууллагын дэмжлэгтэйгээр зохион байгуулж байна.

Socia lGood Summit нь жил бүр НҮБ-ын Ерөнхий Ассемблейн чуулганы үеэр нь Нью-Йорк хотноо тав дахь жилдээ зохиогдож байгаа бөгөөд дэлхийн удирдагчид, сайн дурын идэвхтнүүд, салбар бүрийн  төлөөлөгчид, манлайлагчид төдийгүй иргэд, олон нийт нэгэн зэрэг оролцож дэлхийн дахинд тулгамдаж буй хөгжлийн асуудлууд, нийгмийн сайн сайхны төлөө тодорхой сэдвийн хүрээнд хэлэлцэн, дэвшүүлсэн санаа, илтгэл, оролцогчдын санал бүрийг мэдээллийн технологийн хэрэгслүүд, нийгмийн сүлжээний цахим сувгуудаар дамжуулан олон нийтэд хүргэж, онлайн оролцогчид санал бодлоо чөлөөтэй илэрхийлэх, дуу хоолойгоо хүргэх боломжийг бүрдүүлдэг онцлогтой арга хэмжээ болдог.

Энэ өдрүүдэд дэлхийн 60 гаруй оронд салбар уулзалтуудыг санаачлан зохион байгуулж байна. Энэ жилийн хувьд дэлхийн Social Good Summit (www.mashable.com/sgs/)  9-р сарын 21-22- ны өдрүүдэд Connecting for Good, Connecting for All  #2030NOW буюу  Нийгмийн сайн сайхны төлөө бүгдийг холбоё “2030 онд та ямар дэлхийд амьдрахыг хүсэж байна вэ?” асуултын хүрээнд өрнөх бөгөөд  бидний аж төрч буй дэлхий ертөнцийг илүү сайн сайхан болгохын тулд нийгмийн салбарт мэдээлэл технологийн дэвшлийг хэрхэн яаж хэрэглэх, нэвтрүүлэх талаар хэлэлцэж байна.

Улаанбаатарт болж буй уулзалтын үеэр

–          Технологи болон Нийгэмд ээлтэй бизнес,

–          Мэдээлэл Холбооны Технологи ба Нөхөн үржихүйн эрүүл мэнд,

–          Эмэгтэйчүүд ба Технологи,

–          МХТ ба Ардчилал, боловсрол  гэсэн 4 сэдвийн хүрээнд тэргүүлэгчид болон илтгэгчдээс гадна 100 гаруй оролцогч залуучуудыг хамарсан салбар хэлэлцүүлэг өрнөсөн бөгөөд асуудлыг хэрхэн шийдвэрлэх талаар гаргасан залуучуудын санал санаачлагыг нэгтгэн, уриалга гаргаж цаашид үргэлжлэх үр дүнтэй үйлс болгохоор ярилцаж байна.  

Уулзалтын нээлтэнд Мэдээллийн технологийн үндэсний парк /МТҮП/-ын Стратеги, бизнес хөгжлийн төвийн дарга П.Наранцэцэг оролцон үг хэлсэн бөгөөд тэрээр хэлсэн үгэндээ МТҮП нь үйл ажиллагааныхаа хүрээнд МТ-ийн салбарын эмэгтэйчүүдийн жижиг бизнесийг дэмжих, ур чадварыг дээшлүүлэх, хамтын ажиллагааг хөгжүүлэх чиглэлээр анхаарч ажиллаж байгаа талаараа дурьдан Мэдээллийн технологийн үндэсний паркыг Шинжлэх ухаан технологийн парк болон хөгжүүлэхэд салбарын залуучууд, эмэгтэйчүүдийн оролцоо чухал үүрэгтэйг онцлон тэмдэглэлээ.

 Дэлгэрэнгүй мэдээллийг авах, хэлэлцүүлгийг дагах, онлайн оролцох сувгууд:  

facebook.com/MNGSocialGood,  twitter.com/MNG_SocialGood, youtube.com/user/MNGSocialGood,

instragram.com/MNG_SocialGood#MNG_SocialGood