Азийн шинжлэх ухааны паркуудын холбооны 9 дэх удаагийн “Удирдлагуудын уулзалт” 6-р сарын 19-21-нд Монгол улсад амжилттай зохион байгуулагдлаа

МТҮП нь 2002 оноос эхлэн Монгол улсад анхны мэдээллийн технологийн инкубаторыг ажиллуулах, инновацийг бүтээх гарааны компаниудыг дэмжих, хөгжүүлэх, хүний нөөцийн ур чадварыг дээшлүүлэх, олон улсын шалгалтыг зохион байгуулах зэрэг ажлыг гүйцэтгэсээр ирсэн бөгөөд одоогийн байгаа туршлага мэдлэг, нөөц дээр тулгуурлан шинжлэх ухаан технологийн парк болохоор зорин ажиллаж байна.

Бид харилцан туршлага, мэдлэг мэдээллээ солилцох, үйл ажиллагааг хэрэгжүүлэх, хөгжлийн загварыг нэвтрүүлэх, хамтран ажиллах зорилгоор 2012 онд Азийн шинжлэх ухааны паркуудын холбооны гишүүн байгууллага болсон. МТҮП нь Монгол улсаа төлөөлөн гишүүн болсноор бусад холбооны гишүүн байгууллагуудтай харилцан туршлага солилцох, хамтарсан төсөл хөтөлбөр хэрэгжүүлэх, шилдэг паркуудын хөгжлийн загварыг нэвтрүүлэх, ОУ-ын арга хэмжээнд оролцох, зохион байгуулах, хамтын ажиллагаагаар дамжуулан үйл ажиллагаагаа олонд таниулан сурталчлах боломж нээгдээд байна.

Тус холбоо нь жил бүр гишүүн байгууллагын удирдлагуудын уулзалтыг зохион байгуулдаг уламжлалтай билээ. Энэ жилийн удирдлагуудын 9 дэх уулзалт 6-р сарын 19-21-ний өдрүүдэд МУ-д анх зохион байгуулагдаж байгаагаас гадна Азийн шинжлэх ухааны паркуудын холбооны 27 дахь захирлуудын удирдах зөвлөлийн хурлаар холбооны шинэ ерөнхийлөгчийг нөхөн сонгох үйл ажиллагаа болсноороо онцлогтой байлаа.

6-р сарын 19 буюу үйл ажиллагааны эхний өдөр Азийн шинжлэх ухааны паркуудын холбооны гишүүд, төлөөлөгчид Монголын мэдээллийн технологийн тэргүүлэгч компани болох IT Zone ХХК болон Электрон машин, механизмын тэргүүлэгч компани болох Экобус ХХК-аар зочлон тэдгээрийн үйл ажиллагаатай танилцлаа. Мөн захирлуудын удирдах зөвлөл хуралдан, шинээр холбооны Ерөнхийлөгчөө нөхөн сонгов. 6-р сарын 20-нд буюу хоёр дахь өдөр үйл ажиллагааны нээлт, Удирдлагуудын уулзалт, Бизнес уулзалт зэрэг үндсэн арга хэмжээнүүд боллоо.

Азийн шинжлэх ухааны паркуудын холбооны удирдлагуудын 9 дэх уулзалтыг МТШХХТГ-ын дарга Ц.Жадамбаа нээлээ. Нээлтийн үйл ажиллагаанд БШУЯ-ны шинжлэх ухааны бодлого зохицуулалтын газрын дарга ноён Ж.Даваасамбуу ирж баяр хүргэж, үг хэлэв. Мөн Азийн шинжлэх ухааны паркуудын холбооны 9 дэх уулзалтаар шинээр нөхөн сонгогдсон холбооны ерөнхийлөгч Японы Канагава Шинжлэх ухааны паркын ерөнхийлөгч ноён Хирохиса Учида үг хэллээ.

Удирдлагуудын уулзалтаар БНСУ, Тайвань, Япон зэрэг орноос шилдэг паркуудын туршлагаасаа хуваалцан илтгэл тавьсан бол Монголоос Эдийн Засгийн Хөгжийн Яамны инноваци олон нийт, хувийн хэвшлийн түншлэлийн газрын дарга ноён С.Бэхбатыг төлөөлж Шинжлэх ухааны парк, инновацийн олон улсын хамтын ажиллагааны асуудал хариуцсан мэргэжилтэн Л.Дашдэмбэрэл “Монголын үндэсний инновацийн тогтолцоо ба түүнд шинжлэх ухаан технологийн паркын эзлэх байр” сэдвээр, Шинжлэх Ухаан Технологийн Сангийн ахлах мэргэжилтэн хатагтай А.Тамир “Монгол Улсын шинжлэх ухаан технологийн парк байгуулах бодлого” сэдвээр, МТҮП-ын зөвлөх, удирдах зөвлөлийн гишүүн Д-р.Ц.Түвшинтөр “МУ-ын МТ-ийн паркын стратегийн хөгжил” сэдвээр тус тус илтгэл тавьж хэлэлцүүлэг өрнүүллээ. Мөн холбооны гишүүн байгууллагуудын хамтын ажиллагааг бататган бэхжүүлж, ASPA-ийн гишүүн байгууллагуудтай хамтарсан төсөл хөтөлбөр хэрэгжүүлэх талаар харилцан зөвшилцсөн төдийгүй Монгол улсад шинжлэх ухааны парк байгуулахад тулгарч буй бэрхшээл, хэрхэн шийдвэрлэх тал дээр зөвлөгөө авч, туршлага солилцов.

Бизнес уулзалтаар БНСУ-аас Электрон техник, машин механизм болон мэдээлэл холбоо технологийн салбарын тэргүүлэгч 7 компани, МУ-аас 20 орчим МТ-ийн компани оролцон харилцан туршлага солилцон, ололт амжилтаасаа хуваалцаж, цаашид хамтран ажиллах талаараа ярилцсан.

Удирдлагуудын 9 дэх уулзалтанд Азийн шинжлэх ухааны паркуудын холбооны удирдах зөвлөлийн гишүүд, Тайвань, Япон, БНСУ, Вьетнам зэрэг орны шинжлэн ухаан технологийн 7 паркын удирдлага, БНСУ-ын Электрон техник, машин механизм болон мэдээлэл холбоо технологийн салбарын 7 компаний тэргүүлэгчид г.м нийт 30 гаруй зочид төлөөлөгчид оролцсон бол МУ-аас төрийн болон төрийн бус байгууллага, Их дээд сургууль, МТ-ийн салбарын 70 гаруй зочид, төлөөлөгч хамрагдлаа.

МУ-ын МТ-ийн хөгжилд үнэтэй хувь нэмэр оруулан Азийн шинжлэх ухааны паркуудын холбооны удирдлагуудын 9 дэх уулзалтыг хамтран зохион байгуулж, дэмжлэг үзүүлсэн БШУЯ, ЭЗХЯ, ШУТСан, ХАҮТ, Мэдээлэл холбооны сүлжээ ТӨХК, ШУТИС, Монголын програм хангамж үйлдвэрлэгчдийн холбоо, МТ-ийн салбарын тэргүүлэгч компани болох IT zone ХХК, Саммит ХХК, Интерактив ХХК, Интерактив Би Ай ХХК, Экобус ХХК нарт чин сэтгэлийн талархал илэрхийлье.