МТҮП-ын олон улсын шалгалтын төвийн хоёр дахь эрх баталгаажлаа

Мэдээллийн технологийн үндэсний парк (МТҮП) олон улсын “Компьютерийн хэрэглээ”-ний гэрчилгээ олгох албан ёсны шалгалтын төвтэй боллоо. Ингэснээр олон улсын шалгалтыг өөрийн орондоо зохион  байгуулах  хоёр дахь эрх, боломж, нөхцөлийг бүрдүүлж чадсаныг дуулгахад бахархалтай байна.

Олон улсын хэмжээнд зөвшөөрөгдсөн мэдээллийн технологийн чиглэлийн шалгалт явуулах эрх бүхий  шалгалтын төв 2015 оны 4-р сарын 1-ний өдөр үйл ажиллагаагаа эхэлснээр олон улсын байгууллагаас өгсөн хоёр дахь эрх  баталгаажиж байна. Манай анхны олон улсын шалгалтын төв 2006 онд Мэдээллийн технологийн инженерийн шалгалт (МТИШ)-анд бэлтгэх сургалтаар эхэлж байсныг МТ хөгжүүлэгчид хэдий нь мэдэх болсон. Тун удахгүй МТИШ-ын 9 дэх хаврын шалгаруулалт болох бөгөөд өнгөрсөн хугацаанд нийт 122 шалгарагч Азийн 12 оронд хүлээн зөвшөөрөгдсөн гэрчилгээг гардан авч, гадаад, дотоодын нэр хүнд бүхий байгууллагад ажиллаж, их, дээд сургуульд суралцаж байгаа билээ.

МТҮП-т олгосон олон улсын хоёр дахь шалгалтын төвийн гол зорилго албан хаагч, оюутан залуус төдийгүй ахлах ангийн сурагч, компьютерийг  өдөр тутмын ажил, амьдрал, сурч боловсрохдоо ашигладаг хүн бүрт  “Компьютерийн хэрэглээ”-ний олон улсын түвшний шалгалтыг амжилттай хамгаалахад гүүр болж мэдлэг, ур чадвар олгох юм. Түүнчлэн олон улсад компьютерийн хэрэглээ хэрхэн үнэлэгддэг,  үнэлгээний зарчим, стандарт, олон улсын шалгалтын агуулга, ач холбогдолтой  танилцахаас гадна төр болон хувийн хэвшлийн мэдээллийн технологийн мэргэжилтнүүдийн ур чадвар дээшлэх боломж ч бүрдэнэ. “Компьютерийн хэрэглээ” олгох  олон улсын шалгалтын төвтэй болсон нь монгол хүн бүрт дэлхийд оюунаа үнэлүүлэх гарц  дахин нэг шат дээшилсний баталгаа болох юм.

Мөн олон улсын  шалгалтыг дотооддоо зардал, чирэгдэлгүй зохион байгуулж олон хүнд хүргэснээр хүний нөөцийн чадавхи дээшилж энэ хэрээр   манай улсын  мэдээллийн технологийн хөгжлийн цар хүрээ тэлж, монгол хүний оюун ухаан дэлхий нийтэд улам бүр хүлээн зөвшөөрөгдөх боломжтой болно. Үүний үр дүнд “Олон улсын компьютерийн хэрэглээний гэрчилгээ” гардагчдын тоо нэмэгдэж энэ бүхэн манайханд өгсөн олон улс дахь үнэлэмж болох билээ.

Анх “Европийн компьютерийн хэрэглээний гэрчилгээ” буюу ECDL  хөтөлбөр нэрээр зохиогддог  байсан уг шалгалт зөвхөн Европ төдийгүй олон улсын хэмжээнд шаардлагатай болж тив дамжин хүрээгээ тэлжээ. Тиймээс үйл ажиллагааны шаардлагаар “Олон улсын компьютерийн хэрэглээний гэрчилгээ”  ба ICDL  болж өргөжиж чадсан байна. Өөрөөр хэлбэл нэрний хувьд ECDL буюу ICDL нь зарчмын ялгаагүй, аль аль нь адилхан хөтөлбөр хэрэгжүүлдэг аж.

“Олон улсын компьютерийн хэрэглээний гэрчилгээ”-ний шалгалт “Үндсэн”, “Стандарт”, ”Ахисан” түвшний гурван модультай.  ICDL модуль бүр шалгалтаар баталгаажсан хамгийн сүүлийн үеийн мэдээллийн технологийн ур чадвар, мэдлэгийг практиктай хослуулсан агуулгыг хөтөлбөртөө тусгадаг байна. Модулийн түвшин  тус бүрт гэрчилгээ олгодог давуу талтай тул “та, чи, би, бид” хэн боловч шалгалтанд оролцох боломжтой. Тиймээс өөрийгөө сорих буюу ажлын байрны шаардлагад тавигдсан компьютерийн ур чадвараа хөгжүүлж, олон улсын түвшинд үнэлүүлж, баталгаажуулах сайхан боломжийг МТҮП монголчуудад нээлттэй болгож өглөө.

ICDL-ийн “Үндсэн” модуль нь компьютерийн хэрэглээнд зайлшгүй шаардлагатай ур чадварыг баталгаажуулдаг бол “Стандарт” модуль “Үндсэн” модульд суурьлагдсан байх ба таны өдөр тутмын комьпютерийн хэрэглээний мэдлэг, ажлын байрны хэрэглээнд шаардлагатай ур чадваруудыг хөгжүүлэх боломжийг агуулдаг аж. Тухайлбал, илтгэл  тавих, өгөгдлийн сан ашиглах, веб засварлах, зураг засах, төсөл боловсруулах, мэдээллийн технологийн аюулгүйн байдал хангах, онлайнаар бусадтай хамтран ажиллах гэх мэтчилэн онлайн мэдээллийг ашиглах ур чадварыг олгож, баталгаажуулах юм. Харин “Ахисан” модуль нь хамгийн өргөн хэрэглэгддэг  компьютерийн дөрвөн програм дээр мэргэжлийн түвшинд ажиллаж чадах ур чадварыг олгож баталгаажуулдаг байна.

Өөрийнхөө мэдлэг, ур чадварыг зорихыг хүссэн та бүхэнд дуулгахад “Ахисан” модулийн шалгалтыг өгөхөөс өмнө ICDL-ийн “Үндсэн” болон “Стандарт” модулийг дуусгасан байх шаардлагатай. Учир нь  “Ахисан” түвшний модулийн шалгалтыг давахад бүр илүү хялбар байх гэдэг үүднээс энэхүү  шаардлага  ч та бүхэнд тустай байх болно.

.