Дэлхийн технополисийн холбооноос зохион байгуулсан Глобал инновацийн чуулган, сургалтанд оролцлоо.

2015 оны 9-р сарын 22-25-ны өдрүүдэд Бүгд Найрамдах Солонгос Улсын Тэжон хотод ЮНЕСКО, Дэлхийн Технополисийн Холбооноос хамтран зохион байгуулсан “Тэжон глобал инновацийн чуулга-2015”, “ЮНЭСКО-ДТХ” хамтарсан сургалт семинарт  Мэдээллийн Технологийн Үндэсний Паркаас  туршлага солилцох, инновацийн тухай мэдлэгээ тэлэх, Шинжлэх ухаан, технологийн дэлхийн чиг хандлагын талаар мэдээлэл авах зорилготойгоор нийт 4 төлөөлөгчид амжилттай оролцоод ирлээ.

Энэ жилийн хувьд нэгэн зэрэг 3 үйл ажиллагаа зохион байгуулагдсан ба “Тэжон глобал инновацийн чуулга”, “ЮНЭСКО-ДТХ” хамтарсан сургалт семинар, “Өндөр технологийн үзэсгэлэн” гэсэн 3 арга хэмжээ зэрэг зохион байгуулагдсанаас гадна ЮНЕСКО-ийн 70 жилийн ойн баяр давхар тохиолдсоноороо онцлог байлаа.

Тэжон глобал инновацийн чуулга

Энэхүү чуулга нь “Инновацийн үр шимийг хуваалцах нь” сэдвээр 2015 оны 9-р сарын 23-24-ний хооронд Тэжон хотын Конвенцийн төв дээр болсон ба чуулганд МТҮП-ын МССТөвийн дарга С.Билгүүн, ИБХТөвийн хуульч Б.Отгонжаргал нар оролцсон.  Уг чуулга нь 3 нэгдсэн хуралдаан, сэдэвчилсэн тусгай хуралдаан зэргээс бүрдэж нийт 25 илтгэгчид  “Шинжлэх ухаан, технологийн дэлхийн чиг хандлага ба бэрхшээлүүд”, “Жижиг дунд бизнес эрхлэгчдийн инновацийн мэдлэгийг бататгах”, “Инновацийн анхдагч ба бизнес эрхлэгчдийн хөгжил” сэдвүүдийн дор зохион байгуулагдсан юм.

ЮНЭСКО-ДТХ хамтарсан сургалт семинар

Тус сургалт нь 2015 оны 9-р сарын 22-24-ний хооронд Иннополис Сангийн хурлын танхимд болж  өндөрлөсөн ба сургалтанд МТҮП-ын ИБХТөвийн санхүүгийн мэргэжилтэн Ж.Мягмарсүрэн, ИТТөвийн судалгаа бизнес хөгжүүлэлтийн мэргэжилтэн Ц.Цэцэгмаа нар оролцсон юм. Сургалт семинар нь 3 хэсгээс бүрдсэн бөгөөд “Бүс нутгийн инновацийн платформ ба технополис”, “Бүс нутгийн платформд инновацийн экосистемийг байгуулах нь’’  Шинжлэх ухааны хотууд болон шинжлэх ухаан, технологийн паркууд дахь старт-ап компаниудын өсөлт”, “Шинжлэх ухаан, технологийн парк, Технополис – Эрдэм шинжилгээний байгууллага-Аж үйлдвэр – Засгийн газрын хамтын ажиллагаа” сэдвүүдийн дор нийт 7 илтгэгч илтгэл тавигсан бөгөөд мөн улс орнуудын шилдэг туршлага, илтгэлүүд тавигдсан юм. Тус үйл ажиллагааны үеэр “Монгол Улсад Шинжлэх ухаан, технологийн паркыг хөгжүүлэх нь” сэдвээр Мэдээллийн технологийн үндэсний паркын Судалгаа, бизнес хөгжүүлэлтийн мэргэжилтэн Ц.Цэцэгмаа илтгэл тавилаа. Мөн үйл ажиллагааны төгсгөлд оролцогчид Сөүл хотод орших Дижитал медиа сити-тэй танилцах аялалд оролцсон юм.