“Монголын програм хангамж үйлдвэрлэлийн салбарын III чуулган” зохион байгуулагдах гэж байна

Монголын програм хангамж үйлдвэрлэгчдийн ирээдүйн хөгжлийг тодорхойлох зорилгоор “Монголын програм хангамж үйлдвэрлэлийн салбарын гуравдугаар чуулган” 2015 оны 11 дүгээр сарын 11-ний өдөр Мэдээллийн технологийн үндэсний парк-д зохион байгуулагдах гэж байна.

“Дэлхийд танигдъя” уриатай энэхүү чуулганыг Монгол улсын Засгийн газрын хэрэгжүүлэгч агентлаг Мэдээллийн технологи, шуудан, харилцаа холбооны газар /МТШХХГ/, Мэдээллийн технологийн үндэсний парк /МТҮП/, Монголын програм хангамж үйлдвэрлэгчдийн холбоо /МОСА/ зэрэг байгууллагууд хамтран зохион байгуулна.

Чуулганы зорилго нь дэлхийд танигдсан стартап бизнесийг Монголдоо бий болгож хөгжүүлэх, олон улсад бүтээгдэхүүнээ танилцуулан хөрөнгө оруулалт татахаар ажиллаж байгаа стартап компаниудтай туршлага солилцох, АНУ-ын силикон валлейд ажиллаж буй мэргэжлийн экспертүүдээс онлайн зөвлөгөө авах, төр засгийн бодлого, дэмжлэгийг энэ салбар луу чиглүүлэхэд оршино.

Тус чуулган нь салбар хуралдаан, програм хангамжийн үйлдвэрлэл үйлчилгээ эрхлэгч компаниудын бүтээгдэхүүн, үйлчилгээний үзэсгэлэн гэсэн 2 хэлбэрээр зохион байгуулагдах бөгөөд чуулганы ерөнхий ивээн тэтгэгчээр Скайтел компани, ивээн тэтгэгчээр Веритек, Монотт зэрэг компаниуд тус тус оролцоно.

Энэ жилийн чуулганаар үндэсний програм хангамжийн стартап бизнесийг дэлхийн зах зээлд гаргах арга замыг тодорхойлоход голчлон анхаарч, энэ хүрээнд стартап гэж юу болох, Монголын стартап бизнесийн өнөөгийн нөхцөл байдал, давуу болон сул талууд, үндэсний стартап бизнесийн олон улсад ажиллаж байгаа туршлага, стартап бизнесийг дэмжиж байгаа гадаад улс орнуудын бодлого, туршлага, дотоодын хөрөнгө оруулагчид стартап компаниудтай хамтарч ажиллах боломж, олон улсын компаниудын хууль, эрхзүй, татвар, санхүүгийн хувьд анхаарах зүйлс, үндэсний стартап бизнесийг олон улсад өрсөлдөхүйц түвшинд хүргэхэд бодлогын дэмжлэг үзүүлэх шийдлүүдийг тодорхойлох, зөвлөмж гарган, чуулганы төгсгөлд танилцуулах юм.

Хамрах хүрээ: Чуулганд төрийн өндөр албан тушаалтнууд, бодлого тодорхойлогчид, мэдээлэл, харилцаа холбоо, технологийн салбарын байгууллага, үндэсний програм хангамжийн компаниуд, стартап компаниуд болон их дээд, мэргэжлийн сургуулиудын эрдэмтэн, багш судлаачид, бүтээгдэхүүн үйлчилгээний хэрэглэгч, олон улсын хуулийн фирм, PWC компанийн Монгол дахь төлөөлөгчийн газар болон хэвлэл мэдээллийн төлөөллүүд оролцоно.

Чуулганы бүртгэл онлайнаар явагдана. Дэлгэрэнгүй мэдээллийг www.chuulgan.mn, сайтаас авч чуулганд бүртгүүлэх боломжтой.