Хүүхэд залуучуудын “Ухаалаг ном” бүтээх тэмцээн дүнгээ гаргалаа

Мэдээллийн технологи, шуудан харилцаа холбооны газар, Хүүхдийн төлөө үндэсний газар хамтран хүүхдэд зориулсан монгол хэл дээрх боловсролын контентыг нэмэгдүүлэх, интернэтийн зөв хэрэглээг бий болгох, цахим боловсрол олгох зорилгоор анх удаа зохион байгуулагдсан “Ухаалаг ном” бүтээх тэмцээнд 16 баг оролцож, шилдэг бүтээлээ тодрууллаа. Тэмцээний шилдэг бүтээл бүхий багаар Дархан-Уул аймгийн Дархан 26 дугаарын сургуулийн Ц.Батсүрэн багштай “E-KIDS” баг тодорч, 2015 оны 11 дүгээр сарын 10-нд шагналаа гардан авлаа.

Манай улсад интернэт хэрэглээний түвшин нэмэгдэж, залуу үеийнхэн мэдээллийн технологийг ихэд сонирхох болсон байна. Интернэт орчинд монгол хэл дээр бэлтгэгдсэн, хүүхдэд зориулсан сургалтын материал дутмаг байгаагаас хүүхэд, залуучууд интернэтийг цаг нөгцөөх, зугаацах байдлаар ашиглаж байгааг бууруулах үүднээс тус тэмцээнийг жил бүр уламжлал болгон зохион байгуулах юм.
Ухаалаг ном тэмцээнийг хамтран зохион байгуулагчаар Мэдээллийн технологийн үндэсний парк, Үндэсний дата төв УТҮГ, Монголын сурагчдын холбоо, ивээн тэтгэгчээр Интерактив Би Ай ХХК, Инносолюшн ХХК зэрэг байгууллагууд ажиллалаа.