Инкубаторынхан “Бид юун дээр алдав” асуултыг онч мэргэн онилж чадлаа

Манайд бойжиж байгаа инкубаторын компаниуд өнгөрсөн саруудад бизнес болон санхүүгийн  төлөвлөгөөгөө биелүүлэх явцад  ямар алдаа гаргасан, юун  дээр анхаарах байснаа шүүн тунгаахаар баасан гарагт өвөрмөц уулзалтыг зохион байгуулав. Инкубаторын захирлуудын уулзалтын нэр “Бид юун дээр алдав”. Уулзалт ярилцлагын зорилго, ярианы сэдэв ч “Бид юун дээр алдав”. Бүтэн жилийнхээ ололт амжилтыг дүгнэн хэлэлцэж, сайн үйлээ алдаршуулдаг бол бидний уулзалт харин эсрэгээрээ. Ололт амжилтаа дурдалгүй дан  ганц  “Бидний  алдаа юу байв” асуултыг компанийн захирлууд өөрсөддөө тавьж, өөрсдөө алдаагаа илрүүлж,  нийт захирлуудын дунд нээлттэй хэлэлцүүллээ. Өөр бусад хөндлөнгийн хэн нэгнээр алдаа, дутагдлаа хэлүүлж, шүүмжлэлд өртсөнөөс өөрсдийн гаргасан алдаагаа ил тод илтгэх  нь илүү үр дүнтэйг хэн бүхэнд мэдрүүлсэн уулзалт-хэлэлцүүлэг болж чадлаа.

Ер нь сар бүрийн үнэлгээний дараа инкубаторын захирлуудын уулзалт  болдог уламжлалтай ч уг уулзалтаас  өөр өнгө аястай болсон төдийгүй захирлууд маань өнгөрсөн хугацааны алдаагаа дахин давтахгүйн тулд алдаа нэг бүрээ илүү онч мэргэн онилж чадлаа. Тиймээс ч ярих хэлэх, хэлэлцэх, зөвлөх, гарц олох гэх мэтчилэн хариулт олонтай байсан уг уулзалт чамгүй хугацаанд үргэлжилж, төлөвлөсөн цагтаа багтахгүй дахин цаг товлож, 12-р сарын 01-нд дуусаагүй сэдвээ үргэлжлүүлэхээр болов.

“Смарт инноваци системс” ХХК-ийн хувьд шинэ санаа бүхий зургаан бүтээгдэхүүнийг зах зээлд нэвтрүүлэхэд бэлэн болгосон бөгөөд тэдгээрийг нутагшуулах тал дээр маркетинг маш сул,  борлуулалтын суваг буруу  байсныг онцолсон захирал О.Тэнгисийн алдаанд зөв менежмент хийхэд МТҮП-ын ИБХТ-ийн дарга П.Наранцэцэг болон инкубатор хариуцсан мэргэжилтэн болон бусад захирлууд сонголт хийх гарцыг хэлж өгөв.  Ялангуяа тус компанийн бүтээгдэхүүн shinjilgee.mn  програмыг түгээмэл байгаа  хувийн эмэгтэйчүүд, шүдний эмнэлгүүдэд зах зээлийн үнээр борлуулах гарцыг нэмэгдүүлэхэд  “Ай Пи консалтинг” ХХК-ийн захирал  Д.Дэлгэрцоо нэлээд сувагчлал олж өгч “борлуулалтын менежер” хийхээр болов.  Түүнчлэн “Хайрхан семикондакторс” ХХК-ийн захирал М.Баярпүрэв багш  “Мобиком” корпорацийн захиалгат ажил “Серверийн хөргүүр” цогц ажлыг гүйцэтгэх явцад гаргасан алдааны улмаас маш их алдагдал хүлээснээ менежментийн буруу байсныг онцоллоо. Энэ бүхнийг гүйцэтгэлийн явцад бус сүүлд ухаарч байгаа ч гэлээ бизнесийн цаашдын ажилд том сургамж болох сайн тал  байхыг үгүйсгэхгүй гэж П.Наранцэцэг дарга захирлуудад урам өглөө.

Ийнхүү инкубаторынхан гарааны бизнесээ хөл дээр нь босгох, шинэ санаанаас төрсөн бүтээгдэхүүнээ зах зээлд нутагшуулах тал дээр тулгарч буй нэгнийхээ асуудал, алдааг сонсож, алдаа нь юун дээр байгаа, цаашид гажуудлыг хэрхэн засч, чиглүүлж болохыг зөвлөж, хамтран ажиллах гарцыг эрэлхийлэх зорилго тэднийг улам ойртууллаа. “Бид юун дээр алдав” уулзалтыг эрт зохион байгуулсан бол алдаа бага гаргаж компаниудын өмнөх саад бэрхшээлийг хамтдаа эртхэн залруулах байлаа хэмээн уулзалтын сайн тал, үр дүнд захирлууд ам сайтай байв.