Монгол дахь мэдээллийн технологийн инженерүүдэд олон улсад хүлээн зөвшөөрөгддөг сертификат бүхий шалгалтыг монголдоо өгөх боломжийг өгч байгаад нь баярладаг

МТИШ-нд хамгийн өндөр оноо авч тэнцсэн У.Наранбаяртай ярилцлаа.

Танд юуны өмнө МТИСШ-д хамгийн өндөр оноо авч, тэнцсэнд баяр хүргэе. Өөрийгөө товч танилцуулна уу.
Баярлалаа. Намайг Ууганбаярын Наранбаяр гэдэг. Би Монгол улсын их сургуулийн Хэрэглээний шинжлэх ухаан инженерчлэлийн сургуулийн Мэдээлийн технологийн ангийн 4-р курсын оюутан.

МТҮП-аас зохион байгуулдаг МТИШ-ын талаар чиний сэтгэгдэл.
Монгол дахь мэдээллийн технологийн инженерүүдэд олон улсад хүлээн зөвшөөрөгддөг сертификат бүхий шалгалтыг монголдоо өгөх боломжийг өгч байгаад нь баярладаг. Мөн шалгалтын зохион байгуулалт нь их гоё болдог юм байна лээ. Манай Монгол улсын их сургуулийн оюутнууд энэхүү шалгалтанд байнга оролцдог бөгөөд тэнцэхгүй байсан ч шантралгүй дараа жил нь алгасалгүй дахин өгдөг. Миний бодлоор шалгалтанд тэнцэхгүй байж болно, хамгийн гол нь тус шалгалтыг өгснөөр тухайн шалгуулагч нь маш их мэдлэг олж авдаг нь чухал юм.

МТИСШ-ыг ямар зорилгоор өгсөн бэ? Хэдэн оноо авахаас хэдэн оноо авсан бэ?
Би 2014 оны 10 сарын 26-ны өдөр зохион байгуулагдсан МТ-ийн инженерийн суурь шалгалтыг өгсөн. Шалгалтыг өөрийнхөө эзэмшиж байгаа мэргэжлийнхээ дагуу мэдлэгээ сорьж үзэх зорилготойгоор өгсөн. МТ-ийн инженерийн суурь шалгалт нь өглөө болон өдрийн гэсэн 2 хэсэгтэй байдаг бөгөөд өглөө, өдрийн шалгалтанд хоёуланд нь тэнцсэн тохиолдолд тэнцсэнд тооцдог шалгалт юм. Миний хувьд өглөө болон өдрийн шалгалтанд нийт 200 оноо авахаас 149 оноо авч тэнцсэн юм.

Тус шалгалтанд тэнцсэнээр чамд ямар ямар боломж нээгдэж байгаа вэ? Шалгалтын давуу тал нь юу вэ?
Уг шалгалтанд тэнцсэнээр Азийн 12 оронд хүлээн зөвшөөрөгдсөн сертификат гардан авахаас гадна мэдээллийн технологийн инженер гэдгээ салбарын мэргэжилтнүүддээ батлаж, монголд энэ чиглэлээр үйл ажиллагаа явуулдаг салбартаа тэргүүлэгч МТ-ийн компаниудад ажиллах зэрэг олон боломжууд нээгдэж байгаа юм.

Япон явах болсон сэтгэгдлээ хуваалцана уу. Хэзээ, хаашаа юунд явж байгаа вэ? Ямар зорилготойгоор явж байгаа вэ?
Энэ жилээс эхлэн анх удаа Япон улсын Мэдээллийн технологийг дэмжих агентлагаас МТ-ийн инженерийн суурь шалгалт болон ахисан түвшний шалгалтуудад тэнцээд хамгийн өндөр оноо авсан хүнийг япон улсад МТ-ийн чиглэлээр үйл ажиллагаа явуулдаг компаниудтай танилцах, туршлага солилцох сургалтанд оролцох эрхтэй болж байгаа юм. Тус сургалтын нэр нь “Top Gun Training” гэдэг бөгөөд Япон улс руу 2-р сарын 22-нд явахаар бэлтгэл ажлаа хийж байгаа. Энэ арга хэмжээ нь энэ жил анх удаагаа зохион байгуулагдаж байгаа болохоор их сонирхолтой болох байхаа, мөн уг сургалтанд өөрийн орондоо хамгийн өндөр оноо авсан, мэдлэгтэй хүмүүс оролцож байгаа болохоор тэднээс их зүйл сурах байх гэж бодож байна.
Нэмж хэлэхэд нийт салбарын мэргэжилтнүүддээ болон энэ чиглэлээр сурдаг оюутнууддаа энэ шалгалтыг өгөөд дараагийн япон явах эзэн болоорой гэж хүсмээр байна.