-Монголын анхны бизнесийн  инкубаторыг манай байгууллага 2003 оноос хөгжүүлсэн ба өнөөдрийг хүртэл энэ үйл ажиллагаа улам бүр өргөжсөөр байна. Товчхон статистик тоо дурдахад, нийт 23 удаа элсэлт зохион байгуулж, 220 орчим компани, иргэнийг сонгон шалгаруулалтанд хамруулснаас 94 компанид инкубаторын үйлчилгээ үзүүлж 54 нь амжилттай төгсөж, одоо 9  гарааны компанийг бойжуулж байна. Энэхүү туршлага дээрээ үндэслэн бас нэгэн шинэлэг санаа буюу анхны эмэгтэйчүүдийн инкубаторыг дэргэдээ өсгөн, бойжуулах зорилт тавьсан. Бидний эхлүүлж байгаа “Мэдээллийн технологийн эмэгтэйчүүдийн бизнес инкубатор” төсөл нийгэмд тэр дундаа эмэгтэйчүүдэд хандсан зорилтод төсөл юм. Өөрөөр хэлбэл, одоо байгаа инкубаторын дэд бүтэц, суурь дээр үндэслэн элсэлт болгондоо эмэгтэйчүүдийн багаас бүрдсэн компани, иргэнийг бойжуулах юм. Гол зорилго нь нийгмийн хөгжлийг дэмжсэн, шинэлэг санаатай эмэгтэйчүүдийн манлайлалыг салбарын үйл ажиллагаанд татан оролцуулах, улмаар технологийн эрин зуунтай холбоотойгоор энэ салбарын эмэгтэйчүүдийн оролцоог нэмэгдүүлэх, тухайн салбарт жендерийн эрх тэгш байдлыг бий болгох юм. Төслийн үр дүнд бизнес эрхлэх эмэгтэйчүүдийн гарааны компанид ажлын байрны таатай орчин, менежментийн иж бүрэн дэмжлэг туслалцааг манай паркын зүгээс үзүүлж, инновацид чиглүүлж үндэсний брэнд бүтээгдэхүүн үйлдвэрлэх, дотоод, гадаадын зах зээлд өрсөлдөх чадвартай компанийг Монголд хөгжүүлэхийг зорилго болгож буй юм.

– Зөвхөн эмэгтэйчүүд гэхээр гайхаж магадгүй л дээ. Энэ салбарт ажилладаг эмэгтэй төлөөллийн хувьд МТ-ийн “Эмэгтэйчүүд”-ийн инкубаторын элсэлт авах юмсан гэсэн бодол байсан. Паркын инкубаторын зорилтод салбарыг дэмжих заалтын дагуу нэмэлтээр “Эмэгтэйчүүд”-ийг дэмжих инкубаторын ээлжит элсэлтийг зохион байгуулахаар санал боловсруулсан. Мэдээж энэ ажлыг хийхэд тодорхой дүрэм журам, шалгуур үзүүлэлт хэрэгтэй. Тиймээс “Зорилтот салбар буюу мэдээллийн технологийн эмэгтэйчүүдийн бизнес инкубаторын үйл ажиллагааны журам”-ыг баталлаа. Ер нь Монгол Улсад 2003 оноос мэдээллийн технологийн бизнес инкубатор үйл ажиллагаа явуулж эхэлсэн нь програм хангамжийн чиглэлээр үйл ажиллагаа явуулах хүсэл эрмэлзэлтэй хувь хүн, албан байгууллага, аж ахуйн нэгжүүд монгол хүний мэдлэгт суурилсан оюуны бүтээлийг дотоод, гадаадын зах зээлд нэвтрүүлэх боломж нээгдсэн. Энэ эхлэлийг манай МТҮП тавьсан. Тухайн он цагаас өдийг хүртэл инкубаторын дэмжлэг үзүүлж тэдний бизнесийн амжилтын эхлэлийг хамтдаа бүтээлцсэн хэдий ч өнгөрсөн хугацаанд 90 гаруй компаниас эмэгтэйчүүдийн компаниуд хараахан төрөн гараагүй. Мөн төсөл эхлүүлэх үндэслэл, шаардлага ч байгааг манайхаас явуулсан судалгаа илтгэсэн. Програм хангамжийн компаниудаас авсан судалгаанаас харахад програм хангамжийн мэргэжилтэй эмэгтэй төгсөгчдийн  онолын мэдлэгийг зургаахан хувь нь “сайн” гэж үзсэн байхад 82 хувь нь “муу”, 12 хувь “дунд” гэж үздэг бол мэргэжлийн дадлагын ажлыг эмэгтэй оюутнууд “муу” хийдэг буюу 82 хувийг эзэлсэн байхад үлдэх хувь нь ердөө л “дунд” гэсэн үнэлгээ тавьсан байна. Мөн эмэгтэйчүүдийн зүгээс програм хангамжийн чиглэлээр ажил хийхэд тулгардаг бэрхшээлүүд нь энэ төрлийн ажил хомс, ачаалал ихтэй, хөрөнгө оруулагчид ховорхон байдаг зэрэгтэй холбоотойгоор  тайлбарлаж байна. Зөвхөн 2014 оны элсэлтийн байдлаар Мэдээллийн технологийн мэргэжилтэн бэлтгэдэг томоохон улсын сургуулиудын нэг ШУТИС-ийн харьяа Мэдээлэл Холбооны Технологийн сургуульд нийт 2740 оюутан суралцаж байгаагийн 1073  буюу 37,8 хувь нь эмэгтэй оюутнууд. Эндээс харахад энэ салбарт ажиллах эмэгтэйчүүд тун бага байгаа нь харагдаж байгаа ч  төгсөгчдөөс хэд нь мэргэжлээрээ ажилладаг судалгаа Үндэсний статистикын хорооны статистик үзүүлэлтэнд байхгүй байна. Мэдээллийн технологийн салбарын мэргэжил эзэмшсэн нийт эмэгтэйчүүдэд мэргэжлээрээ ажиллах боломж олгох, МТ-ийн эмэгтэй ажилчдын тоо болон ажлын байрыг нэмэгдүүлэх, тэднийг чадваржуулах, дотоод болон гадаадын зах зээлд өрсөлдөхүйц хэмжээний чадвар, дадлага туршлагыг хуримтлуулах, энэ салбарын жендерийн зөрүүг багасгах үүднээс ”эмэгтэйчүүд” гэж онцолсон байгаа.

-Эхний шатны бүртгэл, анхан шатны сургалт, тавигдах шаардлагын тухай товч мэдээллийг itpark.mn сайтад тавьсан байгаа.  Энэхүү төсөлд хамрагдагсдад “босго”  тийм ч өндөр биш гэж ойлгож  болно. Дотоод, гадаадын их, дээд сургуульд мэдээллийн технологийн чиглэлээр суралцаж байгаа төгсөх дамжааны эмэгтэй оюутан, энэ чиглэлээр мэргэжил эзэмшсэн боловч мэргэжлээрээ ажлаагүй, түр завсардсан, өрх толгойлсон, 3 хүртэлх настай хүүхдээ асарч ажил, хөдөлмөр эрхлээгүй, мэдээллийн технологийн бус мэргэжил эзэмшсэн ч мэдээллийн технологийн салбарын байгууллагад хагас жилээс дээш хугацаагаар ажиллаж байгаа, мэдээллийн технологийн бус мэргэжилтэй ч нэгээс доошгүй жил мэдээллийн технологийн байгууллагад ажиллаж байсан эмэгтэйчүүд сонгон шалгаруулалтын нөхцөлийг хангах юм. Компанийн үндсэн ажилтнуудын 80-аас доошгүй хувийг эмэгтэйчүүд эзэлсэн байх ба “Мэдээллийн технологийн эмэгтэйчүүдийн бизнес инкубатор” төсөлд өрсөлдөж буй компанийн гүйцэтгэх удирдлага нь эмэгтэй хүн байх ёстой. Энэхүү мэдээллээр дамжуулан нэгэн сонирхолтой тоо баримт хэлье. Монголын аль ч салбарт хөдөлмөрийн хөлс буюу жендерийн тэгш бус байдал бодитой оршиж байгаа. Тухайлбал, цалин хөлс өндөртэй ажлын байранд эмэгтэйчүүд ажиллах боломж бага хэвээр байна. Банкны салбарын эмэгтэй ня-бо нарын дөрөв нь, 10 эмэгтэй программистын дөрөв нь, 12 эмэгтэй багшийн тавхан ажилтан л  эрэгтэйчүүдтэй адилхан цалин хөлс авсан байдаг. Ер нь эмэгтэйчүүд маань эрчүүдийн адил ажил эрхлэлтийн боломж, нөхцөл, гавьяа шагналд хүрэхийн тулд зарим зүйлээсээ татгалзахад хүрдэг. /Хожуу төрөх, цөөн хүүхэд гаргах, гэрлэхгүй байх зэрэг/ Энэ нь амьдарлын процессоо эвдэн байж эрчүүдийн адил амжилт гаргах гэсэн оролдлого гэхэд болно. Нэгэнт оршсоор байгаа ялгаатай байдлыг харгалзан үзэж  тусгай зохицуулалт зайлшгүй шаардлагатай өнөөдрийн түвшинд манай байгууллагаас хэрэгжүүлж буй энэхүү төсөл эмэгтэйчүүдийн тодорхой хэсэгт багагүй дэмжлэг, гарц болж чадах юм. Эмэгтэйчүүдийн хөлстэй хөдөлмөр эрхлэлтийн оролцооны түвшин эрэгтэйчүүдийнхээс доогуур байна. 2006 онд боловсролын салбарт ажиллагчдын 68 хувь нь эмэгтэйчүүд байсан хэдий ч сургуулийн захирлуудын дийлэнхи нь эрэгтэй байжээ. Эмэгтэйчүүд нийгмийн ажил эрхлэлтэнд ихээхэн нөлөө үзүүлж ажлын голыг нугалдаг хэдий ч удирдах албан тушаалтангууд нь ихэвчлэн эрчүүд байна. Ажил мэргэжлийн жендерийн тусгаарлалт нь  хөдөлмөрийн төрөл хэлбэрүүд нь нийгмийн нэр хүнд, эрх мэдэл, цалин хөлсний хувьд ялгаатай бөгөөд өндөр нэр хүнд, эрх мэдэл, орлого бүхий хөдөлмөрийн төрөл хэлбэрийг эрэгтэйчүүд эрхлэх болж, эмэгтэйчүүд эдгээр төрлөөс шахагдсан байна.